مسجد میں پائپ لگانے کا حکم:

مسجد کے تحتانی حصہ میں پائپ لگانا اور اوپر سے فرش بنا لینا بالکل جائز نہیں ہے، جب ایک مرتبہ مسجد بن جاتی ہے تو قیامت تک مسجدیت ختم نہیں ہوتی، اور مسجد نیچے تحت الثری تک اور اوپر فوق السماء تک ہوتی ہے، لہذا مسجد کے احترام کے منافی کوئی کام کرنے کی شرعاً اجازت نہیں ہے ۔
ملاحظہ ہو عالمگیری میں ہے:

قيم المسجد لا يجوز له أن يبني حوانيت في حد المسجد أو في فناء ه لأن المسجد إذا جعل حانوتاً ومكاناً تسقط حرمته وهذا لا يجوز والفناء تبع المسجد فيكون حكمه حكم المسجد كذا في محيط السرخسي. (الفتاوى الهندية: ۲/٤٦۲).

در مختار میں ہے:

لو تمت المسجدية ثم أراد البناء منع ولو قال عنيت ذلك لم يصدق تاتارخانية، فإذا كان هذا في الواقف فكيف بغيره فيجب هدمه ولو على جدار المسجد، ولا يجوز أخذ الأجرة منه ولا أن يجعل شيئاً منه مستغلاً ولا سكني، بزازية. (الدر المختار: ٤/۳۵۸، سعيد. وفتاوى قاضيخان: على هامش الهندية: ۳/۲۹۳).

کفایت المفتی میں ہے:
صحن مسجد کا اطلاق دو معنوں پر کیا جاتا ہے اول مسجد کے اس غیر مسقف حصے کو صحن کہتے ہیں جو مہیا للصلاۃ تو ہوتا ہے یعنی نماز باجماعت ادا کرنے کے لیے بنایا جاتا ہے لیکن بغیر چھت کے کھلا چھوڑ دیا جاتا ہے، دوم اس حصے کو بھی صحن کہہ دیتے ہیں جو موضع مہیا للصلاۃ کے مسقف اور غیر مسقف حصے کے بعد خالی زمین یا فرش کی صورت میں چھوڑ دیا جاتا ہے مگر وہ نماز و جماعت ادا کرنے کے لیے نہیں بنایا جاتا ۔
پہلے معنی کے لحاظ سے صحن تو مسجد کا ہی حصہ ہے اور اس کے احکام مسجد کے احکام ہیں اس میں حوض اور وضو کی نالی وغیرہ بنانا جائز نہیں کیوں کہ جو جگہ ایک مرتبہ مسجد ہو جائے اور اس کو نماز کے لیے مخصوص کر دیا جائے پھر اس کو کسی دوسرے کام میں نہیں لا سکتے (کفایت المفتی: ۳/۱۸۲، کتاب الصلاۃ، دار الاشاعت) ۔
واللہ سبحانہ و تعالی اعلم