کھڑے ہو کر وضو کرنے کا حکم:

کھڑے ہو کر وضو کرنا جائز ہے اس میں کوئی قباحت نہیں ہے اصل وضو میں یہ ہے کہ جس انداز سے اعضاء وضو کو دھونے میں آسانی رہے وہ طریقہ اختیار کرنا چاہیے چنانچہ اگر محل وضو کی ساخت کی وجہ سے بعض اعضاء بیٹھ کر اور بعض کھڑے ہو کر دھونا آسان ہو تو ایسا کرنا بہتر ہے کیونکہ اگر کھڑے ہونے کے محل میں بیٹھ کر وضو کیا جائے گا تو دشواری کے ساتھ ساتھ ماءِ مستعمل کپڑوں پر پڑے گا، چنانچہ جب حضرت مفتی محمود الحسن گنگوہی رحمہ اللہ سے سوال کیا گیا کہ کھڑے ہو کر پاؤں دھونا کیسا ہے تو آپ نے رقم فرمایا کہ کھڑے ہو کر پاؤں دھونے میں کوئی مضائقہ نہیں ہے بلکہ ماءِ مستعمل سے تحفظ کے لیے کھڑے ہو کر پاؤں دھونا بہتر ہے ۔ (فتاوی محمودیہ
۷
/
۱٦
) ۔
نیز الدر المختار میں ہے:

والجلوس في مكان مرتفع تحرزاً عن الماء المستعمل. (الدر المختار ۱/ ۱۲۷)

معلوم ہوا کہ وضو میں ایسی ہیئت اختیار کرنا جس سے آسانی رہے اور ماءِ مستعمل سے بچا جا سکے درست ہی نہیں بلکہ بہتر ہے ۔
بخاری شریف میں ہے:

عن كريب مولى ابن عباس رضي الله عنه أن عبد الله بن عباس رضي الله عنه أخبره أنه بات ليلة عند ميمونة زوج النبي وهي خالته فاضطجعت في عرض الوسادة واضطجع رسول الله ﷺ وأهله في طولها فنام رسول الله ﷺ حتى إذ انتصف الليل أو قبله بقليل أو بعده بقليل استيقظ رسول الله ﷺ فجلس يمسح النوم عن وجهه بيده ثم قرأ العشر الآيات الخواتم من سورة آل عمران ثم قام إلى شن معلقة فتوضأ منها. (صحيح البخاري باب قراءة القرآن بعد الحدث ۱/۳۰)

اس روایت سے معلوم ہوا کہ آنحضرت ﷺ نے لٹ کے ہوے مشکیزہ سے کھڑے ہو کر وضو فرمایا البتہ یہ ملحوظ رہے کہ کھڑے ہو کر وضو کرنا آسانی کی بناء پر جائز ہے لیکن نبی کریم ﷺ کا عمل طریقہ وضو میں حضرت علی کرم اللہ وجہہ سے بیٹھ کر وضو کرنے کا منقول ہے ۔ چنانچہ ترمذی شریف میں ہے:

"عن أبي حية قال رأيت علياً توضأ فغسل حتى أنقاهما ثم مضمض ثلاثاً واستنشق ثلاثاً وغسل قدميه إلى الكعبين ثم قام فأخذ فضل طهوره فشربه وهو قائم ثم قال: أحببت أن أريكم كيف كان طهر رسول الله ﷺ. (الجامع الترمذي باب في وضوء النبي كيف كان: ۱/۱۷).

اس روایت سے معلوم ہوا کہ آپ کا عمل بیٹھ کر وضو فرمانے کا تھا لہذا بیٹھ کر وضو کرنا مستحب ہو گا اور کھڑے ہو کر وضو کرنا جائز ہو گا ۔