حکومت کے قانون کے تحت مرتہن کا مرہون پر قبضہ کر لینے کا حکم:

بصورتِ مسئولہ اگر خاص وقت تک راہن دائن قرضہ ادا نہ کر سکے اور حکومت کے قانون کے مطابق مرتہن رہن کو زبردستی اپنے پاس رکھ کر اس کا مالک بنے یا حکومتی قانون کے ماتحت مقدمہ چلا کر مرتہن مقدمہ جیت لے تو دونوں صورتوں میں مرتہن اس زمین یا چیز کا شرعاً مالک نہیں بنے گا ۔
حدیث شریف میں ہے:

عن أبي هريرة رضي الله عنه قال: قال رسول الله ﷺ: "لا يغلق الرهن له غنمه وعليه غرمه". (رواه ابن حبان في صحيحه، رقم: ۵۹۳٤، قال الشيخ شعيب: رجاله ثقات رجال الشيخين غير إسحاق).
والمراد بقوله عليه الصلاة والسلام: "لا يغلق الرهن" على ما قالوا: الاحتباس الكلي والتمكن بأن يصير مملوكاً له. كذا ذكر الكرخي رحمه الله عن السلف. (الفقه الحنفي في ثوبه الجديد: ٤/٤٤۹).

واللہ سبحانہ و تعالی اعلم
اشکال اور جواب:
اشکال: ہاں اگر کوئی یہ اشکال کرے کہ حکومت کے قانون اور استیلاء کی وجہ سے مرتہن مرہون کا مالک بن جانا چاہیے، گویا حکومت کے قانونی غلبہ کی وجہ سے حکومت نے مرتہن کو مالک بنایا جیسے مولانا ظفر احمد عثمانی رحمہ اللہ نے امداد الاحکام (۳/۳۸۲ و ٤۰۲) میں لکھا ہے اور اس کی تفصیل فتاوی دار العلوم زکریا جلدِ پنجم میں گزر چکی ہے، تو اس کا اعتبار کرتے ہوے مرتہن مالک بن جانا چاہیے؟
الجواب: اس کا جواب یہ ہے کہ حقیقی استیلاء یہاں نہیں آیا یہاں ایسا نہیں جیسے کسی کار کی ڈیوٹی ادا نہیں کی گئی ہو اور حکومت اس پر قبضہ کرے، اور قانونی استیلاء در حقیقت استیلاء نہیں اگر مرتہن چاہے تو مرہون کو واپس کر سکتا ہے، ہاں حضرت تھانوی رحمہ اللہ اور مولانا ظفر احمد تھانوی رحمہ اللہ نے میراث کے مسئلے میں قانونی استیلاء کو حقیقی استیلاء ضرورت اور تالیفِ قلب اور مال کی حفاظت اور بطورِ انتقام حقیقی استیلاء کا درجہ دیا ہے یعنی جب قانون کے ماتحت کافر بیٹا مسلمان باپ کا وارث بنتا ہے تو مسلمان باپ کو بھی کافر بیٹے کا وارث مان لیا گیا ورنہ عجیب بات ہو گی کہ غیر مسلم تو ہمارا مال اڑا لیں اور ہم محروم رہیں ۔
واللہ سبحانہ و تعالی اعلم