بعض ورثاء کا بعض اموال پر صلح کرنے کا حکم:

جب کوئی وارث تمام ورثاء کے اتفاق سے ترکہ میں سے کسی متعین رقم کے بدلہ میں اپنے حقِ ترکہ سے دست بردار ہو جائے، اس کو فقہاء کی اصطلاح میں تخارج سے موسوم کیا جاتا ہے۔
فقہاء نے اس بات کی تصریح کی ہے کہ اگر ترکہ میں قرض اور دیون بھی شامل ہوں اور مصالح دیون اور قرضوں سے صلح کرنا چاہے اس طور پر کہ مصالح کا ان قرضوں اور دیون میں کوئی حصہ نہ ہوگا تو یہ صلح باطل ہے۔
وجہ بطلان یہ ہے کہ اس معاملہ میں تملیک الدین من غیر المدیون ہے جو ناجائز ہے۔ مثلاً زید کے دو بیٹے خالد اور بکر تھے زید کے انتقال کے بعد خالد نے والد کی وراثت میں سے مکان لیا اور بکر نے کار لی اور اس کے ساتھ زید کے کسی کے ذمہ ۵ لاکھ رینڈ تھے وہ بھی بکر کے حصے میں آ گئے تو اس صورت میں خالد نے بکر کو ڈھائی لاکھ رینڈ کا مالک بنایا جب کہ بکر مدیون نہیں بلکہ دائن ہے اور چونکہ لوگ اس طرح کے معاملات بکثرت کرتے رہتے ہیں اس لیے فقہاء نے اس معاملہ کی تصحیح کے لیے مختلف حیلے اور تدبیریں کی ہیں۔
مختصر یہ ہے کہ خالد نے ڈھائی لاکھ رینڈ کی تملیک بکر کو کی ہے جس میں تملیک الدین من غیر المدیون لازم آتا ہے تو صاحبِ فتح القدیر نے لکھا ہے کہ دین کی تملیک غیر مدیون کو دائن کی اجازت سے جائز ہے۔
ملاحظہ ہو فتح القدیر میں ہے:

أجيب بأن هبة الدين من غير من عليه الدين إنما لا يجوز إذا لم يأذن للغير في قبضه، فأما إذا وهب الدين من آخر وأذن له في قبضه جاز استحساناً. (فتح القدير: ۷/۱۹۰، كتاب الكفالة، ط: دار الفكر). (وكذا في العناية بهامش فتح القدير: ۷/۱۹۰، والفتاوى الهندية: ٤/۳۸٤،
و فتاوی دار العلوم زکریا:
۵
/
٦۰۰
، ط: بمبئی
).

(ب) اگر مدیون حالتِ افلاس میں مر گیا اور ایک بھائی نے اپنا حصہ عین خرید کر دوسرے بھائی کو مدیون کے حوالہ کیا ہو یعنی مدیون نے اپنے دائن کو اپنے مدیون پر حوالہ کیا ہو اور مدیون المدیون کا حالتِ افلاس میں انتقال ہو چکا تو اب دائن اپنا حصہ دین اپنے مدیون یعنی بھائی سے وصول کر سکتا ہے۔
ملاحظہ ہو ہدایہ میں مرقوم ہے:

فلو سلم له ما قبض ثم توي ما على الغريم له أن يشارك القابض لأنه إنما رضي بالتسليم ليسلم له ما في ذمة الغريم ولم يسلم. (الهداية: ۳/۲۵٤، كتاب الصلح).

یعنی ایک مصالح فریق نے اپنی چیز پر قبضہ کیا اور دوسرے فریق مصالح کا حصہ جو مدیون پر تھا اس کو نہ مل سکا تو یہ پہلے فریق کے ساتھ اس کے وصول شدہ حصہ میں شرکت کر سکتا ہے، اس لیے کہ یہ دوسرا فریق پہلے فریق کو اس چیز کے دینے پر اس لیے راضی ہوا تھا کہ اس کو مدیون سے اپنا حصہ مل جائے اور وہ نہ مل سکا۔

وللاستزادة راجع: (الهداية: ۳/۱۲۹، والعناية ٦/۳۵۰، وبدائع الصنائع: ٦/۱۸، وتبيين الحقائق: ٤/۱۷۲،
و احسن الفتاوی:
۷
/
۱۹٤
، و جدید معاملات کے شرعی احکام:
۲
/
٦۹
،
والدر المختار مع رد المحتار: ۵/ ۳٤۵، سعيد).

نوٹ: یہ مسئلہ ایک طالبِ علم کے سوال کے جواب میں مختلف کتبِ فقہ سے مع اشکالات و جوابات مفصل لکھا گیا تھا، لیکن یہاں ضرورت نہ ہونے کی وجہ سے اور تطویل اور قیل و قال سے بچتے ہوے مختصر جواب پر اکتفا کیا گیا۔
والله سبحانہ و تعالی اعلم