ہوائی جہاز میں سامان گم ہونے پر زیادہ رقم ملنے پر رقم کی زیادتی کا حکم:

بصورتِ مسئولہ امارات اجیر مشترک کے حکم میں ہے کیوں کہ اجرت پر آدمی اور سامان کو ایک ملک سے دوسرے ملک پہنچاتی ہے، اور فقہ کے قاعدے سے اجیر مشترک کے پاس بلا کوتاہی سامان ضائع ہو جائے تو تاوان نہیں آتا، ہاں کوتاہی اور غفلت کی وجہ سے ضائع ہونے پر تاوان آتا ہے پھر اگر بیگ کے مالک نے فہرست میں انہیں اشیاء کا ذکر کیا تھا جو ضائع اور گم ہوئی تھیں اور امارات کمپنی نے اس کو زائد رقم ادا کی تو اس کا لینا اور استعمال کرنا جائز اور درست ہے، لیکن اگر بیگ والے نے زیادہ چیزیں لکھی، مثلاً دو کرتوں کی جگہ چار کرتے لکھے، تو زائد قیمت لینا جائز نہیں، اس کو صدقہ کر دینا چاہیے ۔ ملاحظہ ہو فتاوی ہندیہ میں مذکور ہے:

وحكم الأجير المشترك أن ما هلك في يده من غير صنعه فلا ضمان عليه في قول أبي حنيفة رحمه الله وهو قول زفر والحسن وإنه قياس سواء هلك بأمر يمكن التحرز عنه كالسرقة والغصب أو بأمر لا يمكن التحرز عنه كالحرق الغالب والغارة الغالبة والمكابرة وقال أبو يوسف ومحمد إن هلك بأمر يمكن التحرز عنه فهو ضامن وإن هلك بأمر لا يمكن التحرز عنه فلا ضمان كذا في المحيط، وبعضهم أفتوا بالصلح عملاً بالقولين

وبقولهما يفتي اليوم لتغير أحوال الناس وبه يحصل صيانة أموالهم كذا في التبيين. (الفتاوى الهندية: ٤/۵۰۰).

فتاوی محمودیہ میں مرقوم ہے: اگر دھوبی کی بے پر واہی سے کپڑا گم ہو گیا تو اس کا ضمان لینا درست ہے لیکن اگر دھوبی بے اختیار تھا اور یک دم پانی زیادہ آگیا اور کوشش کے باوجود حفاظت نہ کر سکا تو اس پر ضمان نہیں ۔ (فتاوی محمودیہ: ۱۲/۳٦٤، ط: محمودیہ) ۔
واللہ سبحانہ و تعالی اعلم