میڈیکل ایڈ کے پریمیم پر زائد ادا کر کے فوائد حاصل کرنے کا حکم:

بصورتِ مسئولہ دونوں معاملوں کا تعلق تبرعِ مشروط کے ساتھ ہے کہ پہلے میں مختلف فوائد کو پر یمیم پر کچھ زیادہ ادا کرنے کے ساتھ مشروط کیا ہے، اور دوسرے میں حصولِ فوائد کو بینک کے ساتھ رجسٹر کر کے سالانہ دوسو رینڈ ادا کرنے کے ساتھ مشروط کیا ہے ۔ اور چونکہ اس میں پیسہ کا مقابلہ پیسہ سے نہیں اور نہ ہم جنس سے ہے، نیز جہالت مفضی الی النزاع بھی نہیں ہے، اس وجہ سے جس کا غیر سودی اکاؤنٹ ہو تو اس کے لیے گنجائش ہے ۔ ہاں اگر بینک کی آمدنی زیادہ تر حرام اور سودی کاروبار سے ہو تو ایسے فوائد حاصل کرنے سے بچنا چاہیے ۔ فتاوی ہندیہ میں مرقوم ہے:
فإن كان مجهولاً جهالة مفضية إلى المنازعة يمنع صحة العقد وإلا فلا. (الفتاوى الهندية: ٤/٤۱۱).

فتاوی دار العلوم زکریا میں مذکور ہے:
علاج و معالجہ کی مد میں کمپنی سے خود رقم وصول نہ کریں بلکہ کمپنی خود اس رقم کے عوض علاج و معالجہ کی ذمہ داری اُٹھا لے اور علاج کرا دے تو اس صورت میں جو رقم آپ نے جمع کرائی تھی اس کے عوض میں کمپنی نے آپ کو علاج کی سہولت فراہم کر دی، اگر چہ اس صورت میں ثمن کا عوض مجہول ہے مگر چونکہ یہ جہالت مفضی الی النزاع نہیں ہے اور لوگ ایسی جہالت سے معاملے کرتے ہیں اس لیے اس کی گنجائش ہو گی ۔ (۵/٤۳۵) ۔
تبرعِ مشروط کے دلائل ما قبل میں کئی مرتبہ گزر چکے ہیں، وہاں ملاحظہ کیے جا سکتے ہیں ۔
واللہ سبحانہ و تعالی اعلم