خطبہ کے وقت عصا ہاتھ میں لینے کا حکم:

فقہائے کرام نے لکھا ہے اگر کوئی شہر تلوار سے فتح ہوا ہو تو اس میں امام کو چاہیے کہ تلوار بائیں ہاتھ میں لے اور اس پر ٹیک لگا کر خطبہ دے علامہ شامی رحمه الله نے اس کی حکمت یہ بیان فرمائی ہے ۔ ملاحظہ ہو :

أي بالسيف ليريهم أنها فتحت بالسيف فإذا رجعتم عن الإسلام فذلك باقي في أيدي المسلمين يقاتلونكم حتى ترجعوا إلى الإسلام، درر. (شامي: ۲/۱٦۲، سعيد)

یعنی لوگوں کو یہ دکھائے کہ یہ شہر تلوار سے فتح ہوا ہے اگر تم نے اسلام کو چھوڑا تو مسلمانوں کے ہاتھ میں اب بھی تلوار باقی ہے تم سے لڑ کر تم کو اسلام کی طرف لوٹائیں گے ۔
اور اگر کوئی شہر یا ملک بزورِ شمشیر فتح نہیں کیا گیا بلکہ دعوت و تبلیغ یا صلح سے فتح ہوا ہو تو وہاں عصا کے سہارے خطبہ دیا جائے ۔ مگر یہ عمل نہ فرض ہے نہ واجب اور نہ سنتِ مؤکدہ بلکہ ایک مستحب عمل ہے بشرطیکہ اس کے ساتھ لوگوں کی فرضیت اور لازم ہونے کا عقیدہ وابستہ نہ ہو ۔ اگر لوگ اس کو ضروری سمجھنے لگیں تو پھر اس کو چھوڑنا چاہیے ۔
علامہ طیبی نے شرح مشکوۃ میں لکھا ہے کہ مستحب عمل پر اصرار کرنے سے بدعت بن جاتا ہے پھر جو شخص عصا چھوڑنے والے کو کافر کہتا ہے وہ سخت گنہگار اور عاصی ہے اس کو توبہ کرنی چاہیے کسی مسلمان کو کافر کہنا یا سمجھنا سخت گناہ ہے ۔
امداد الاحکام میں ہے:
عصا لینا مستحب ہے لیکن اگر اس کو ضروری سمجھا جاوے اور تارک پر ملامت کی جائے تو التزام مالا یلزم کی وجہ سے منع کیا جائے گا ۔
في الدر: ويكره أن يتكئ على قوس أو عصا. وفي الشامي: نقل القهستاني: عن المحيط أن أخذ العصا سنة كالقيام. (
امداد الاحکام: ۱/۷۵۹، کراچی)
نیز ملاحظہ ہو: فتاوی محمودیہ: ۸/۲۷۰، مبوب و مرتب، جامعہ فاروقیہ ۔ و احسن الفتاوی: ٤/۱٤۳ ۔
خلاصہ یہ ہے کہ امام صاحب کو چاہیے کہ اکثر و بیشتر عصا نہ پکڑے، ہاں عوام کے عقیدے کی اصلاح کے
بعد مستحب پر عمل کرتے ہوے گا ہے گا ہے عصا ہاتھ میں لیا کریں ۔
واللہ سبحانہ و تعالی اعلم