زکوٰۃ کی رقم سے فقیر کا قرض بذریعہ وکیل ادا کرانے کا حکم:

صورتِ مسئولہ میں فقیر اگر اپنا وکیل مقرر کرے اور وکیل زکوٰۃ کی رقم لے کر فقیر کی طرف سے قرضہ ادا کر دے تو یہ جائز ہے اور زکوٰۃ ادا ہو جائے گی ۔ اور اگر کسی کو وکیل نہیں بنایا صرف اجازت دی تو پھر بھی زکوٰۃ ادا ہو جائے گی، گویا دائن نے فقیر کے لیے قبضہ کر کے اپنی جیب میں رقم ڈال دی ۔
ملاحظہ ہو بدائع الصنائع میں ہے:

ولو قضي دين حي فقير إن قضي بغير أمره لم يجز لأنه لم يوجد التمليك من الفقير لعدم قبضه وإن كان بأمره يجوز عن الزكاة لوجود التمليك من الفقير لأنه لما أمره به صار وكيلاً عنه في القبض فصار كان الفقير قبض الصدقة بنفسه وملكه من الغريم
۔
(بدائع الصنائع: ۲/۳۹، ركن الزكاة، سعيد)
۔
فتاوی ہندیہ میں ہے:

ولو قضي دين الفقير بزكاة ماله إن كان بأمره يجوز وإن كان بغير أمره لا يجوز
۔
(الفتاوى الهندية: ۱/۱۹۰، الباب السابع في المصارف، وكذا في الشامي: ۲/۳٤۵، سعيد)
۔
احسن الفتاوی میں ہے:
مسکین کی اجازت سے اس کا قرض مد زکوٰۃ سے ادا کیا جائے تو جائز ہے، مسکین کو مد زکوٰۃ کا بتانا ضروری نہیں ۔ (احسن الفتاوی: ٤/۲۵۰) ۔
ایضاح المسائل میں ہے:
اگر کوئی شخص بہت زیادہ مقروض ہے اور قرض ادا کرنے کے لئے اگر اس کو زکوٰۃ کی رقم دینے میں یہ خطرہ کہ خود کھا جائے گا اور قرض ادا نہیں کرے گا تو مقروض فقیر سے اس کا قرض ادا کرنے کی اجازت لے کر مالدار آدمی اپنی زکوٰۃ کی رقم سے قرضدار فقیر کا قرض ادا کرے گا تو فقیر کا قرض اور مالدار کی زکوٰۃ دونوں ادا ہو جائیں گے ۔ (ایضاح المسائل: ص ۱۱۳، نعیمیہ) ۔