صدقۂ فطر کی رقم سے کھانا پکوا کر کھلانے کا حکم:

صدقۂ فطر میں زکوٰۃ کی طرح تملیک ضروری ہے اور ایک جگہ بٹھا کر کھلانے میں تملیک نہیں پائی جاتی بلکہ یہ اباحت ہے، اس لیے کہ ان کو اپنی مرضی کے مطابق اس میں تصرف کا حق حاصل نہیں، لہذا صدقۂ فطر ادا نہیں ہوگا، ہاں ہر ایک کے برتن میں تملیکاً دے دیا جائے، تو صدقۂ فطر ادا ہو جائے گا، نیز جیل میں بعض قیدی صاحبِ نصاب بھی ہوتے ہیں، ان کو دینے سے بھی ادا نہیں ہوگا ۔
ملاحظہ ہو البحر الرائق میں ہے:

وأما ركنها فهو نفس الأداء إلى المصرف فهي التمليك كالزكاة فلا تتأدى بطعام الإباحة. (البحر الرائق: ۲/۲۵۲، باب صدقة الفطر، كوئته).

شامی میں ہے:

واشتراط التمليك فلا تكفي الإباحة كما في البدائع هذا ما ظهر لي، تأمل. (شامي: ۲/۳٦۹، باب صدقة الفطر، سعيد).

فتاوی محمودیہ میں ہے:
زکوٰۃ کا کھانا مستحق کو بطورِ تملیک دینا لازم ہے کہ وہ یہ سمجھتا ہو کہ اتنی مقدار میری ملک ہے خواہ میں کھاؤں یا فروخت کروں یا کسی کو کھلاؤں اور ایک ساتھ سب کو بٹھا کر کھلانے میں یہ بات نہیں ہوتی ۔ (فتاوی محمودیہ: ۹/٦۰۲، مبوب و مرتب) ۔
عمدۃ الفقہ میں ہے:
صدقۃ الفطر کا رکن اس کے مصرف کو دے دینا ہے پس یہ دینا بھی تملیک کے طور پر ہونا چاہیے طور پر ہونا چاہیے جیسا کہ زکوٰۃ میں ہے پس طعامِ اباحت (یعنی مباح کر دینے) سے ادا نہیں ہوگا ۔ (عمدۃ الفقہ: ۳/۱٦۸، مجددیہ) ۔
واللہ سبحانہ و تعالی اعلم