ٹیلیفون کی خبر سے ثبوتِ ہلال کا حکم:

ٹیلیفون میں بولنے والا جانا پہچانا آدمی ہے اور اس میں کوئی اشتباہ بھی نہیں ہے اور اس کی سچائی کا ظن غالب ہے اور اپنے یہاں رؤیت کا شرعی فیصلہ ہونے کی خبر دے رہا ہے تو اس کو معتبر مان کر شخصی طور پر عمل کرنا جائز ہے، واجب نہیں، اور اگر ہر طرف سے ٹیلیفون کے ذریعہ متواتر خبریں آئیں اور کثیر تعداد میں لوگ خبریں دیں اور استفاضہ کی حد تک پہنچ جائے تو اس کو شرعی شہادت کا درجہ حاصل ہو جاتا ہے، اور اس پر عمل کرنا لازم ہو جاتا ہے ۔
کتاب الفتاوی میں ہے:
اگر مطلع صاف ہو خواہ مسئلہ عید کے چاند کا ہو یا رمضان کا، رؤیت ثابت ہونے کے لیے خبر مستفیض یعنی اتنے لوگوں کی خبر مطلوب ہے کہ عادۃً ان کا جھوٹ پر متفق ہو جانا ناقابل تصور ہو، اگر مطلع ابر آلودہ ہو، اور مسئلہ رمضان کے چاند کا ہو تو ایک معتبر آدمی کی خبر چاند کے ثبوت کے لیے کافی ہے، گویا ان دونوں صورتوں میں چاند ثابت ہونے کا مدار خبر پر ہے، لہذا ٹیلیفون پر خبر دی جائے اور اطمینان ہو جائے کہ خبر دہندہ اپنا جو تعارف کر رہا ہے، وہ صحیح ہے، اور یہ شخص معتبر ہے تو ٹیلیفون کی ایسی خبروں کو قبول کیا جا سکتا ہے ۔ (کتاب الفتاوی: ۳/۳۷٦) ۔
تفصیل کے لیے ملاحظہ فرمائیں: احسن الفتاوی: ٤/٤۰۷ ۔ ٤۱۲ ۔ فتاوی رحیمیہ: ۵/۱۸۷ ۔ جدید فقہی مسائل: ۲/۲۱ ۔ کفایت المفتی: ٤/۲۱٦ ۔ نظام الفتاوی: ۲/۱٦۳ ۔
واللہ سبحانہ و تعالی اعلم