اختلافِ مطالع کے بارے میں چند سوالات:

مذہبِ احناف میں ظاہر الروایت کے مطابق مشرق کی گواہی مغرب کے لیے کافی ہے جب صحیح طریقہ سے پہونچے یا شہرت و استفادہ کی تعریف میں داخل ہو، جو حضرات اختلافِ مطالع میں کیلو میٹر کا حساب کرتے ہیں ان کے اقوال میں تضاد ہونے کے علاوہ وہ قاعدہ کلیہ کے ذیل میں نہیں آتا، بلکہ اکثر تخمینہ پر مبنی ہے، لیکن محققین علماء بلادِ بعیدہ میں اختلافِ مطالع کا اعتبار کرتے ہیں، جس کی تفصیل گزر چکی ۔
(۲) اس ملک میں اگر واقعی چاند دیکھا گیا، اور احناف کے مذہب کے مطابق اس میں سقم اور خرابی نہیں تو اس کو قبول کر لینا چاہیے، نیز پڑوسی ممالک کی شہادت بھی قبول کی جائے گی ۔
(۳) سعودی عرب کی شہادت قبول نہ کرنے کی ایک وجہ یہ ہے کہ ان کی شہادت اکثر خلافِ ظاہر ہوتی ہے، کیوں کہ چاند مشرق و مغرب دونوں طرف ایک دن میں دیکھا جاتا ہے، جب کہ قدیم و جدید اہل ہیئت کے نزدیک یہ نہیں ہو سکتا، نیز اور کسی جگہ رؤیت نہیں ہوتی، بلکہ بہت سی مرتبہ رؤیت کے دوسرے دن آسمان صاف ہونے کے باوجود چاند کی عام بلکہ کبھی کبھی خاص رؤیت نہیں ہوتی، نیز کبھی چاند ۵/٦ گھنٹے کا ہوتا ہے اور رؤیت کا دعویٰ ہوتا ہے، بلکہ کبھی پیدائش سے بھی پہلے رؤیت کا دعویٰ ہوتا ہے، لہذا خلافِ ظاہر شہادت کو کیسے قبول کیا جائے؟
دوسری وجہ یہ ہے کہ ان کے ہاں فقہ حنبلی کی روشنی میں رمضان کے لیے ایک آدمی کی شہادت اور عید وغیرہ کے لیے دو ثقہ آدمیوں کی شہادت کافی ہے، جب کہ احناف کے نزدیک آسمان صاف ہونے کی صورت میں جمع عظیم درکار ہے، لیکن اس کے باوجود اس اختلاف سے بچنا تو آسان ہے کیوں کہ جب حنبلی قاضی اس کو قبول کر کے فیصلہ کر لے تو احناف اس کو تسلیم کر سکتے ہیں، لیکن خلافِ ظاہر شہادت کو قبول کرنا بہت مشکل ہے، نیز ان کی شہادت کی تفصیلات کا علم بھی اکثر لوگوں کو نہیں ہوتا بلکہ وہاں شخصی حکومت کی وجہ سے ان چیزوں کی تفصیلات تک پہونچنا بھی دشوار بلکہ ناممکن سا ہے، یہ نہ سمجھا جائے کہ سعودی کی رؤیت ہمیشہ غلط ہوتی ہے، بہرحال علماء کے ہاں زیادہ قابل اعتماد نہیں، نیز محققین علماء حضرات بلادِ بعیدہ میں اختلافِ مطالع کے قائل ہیں ان کے نزدیک دیگر وجوہات کی بنا پر ان کی اتباع نہیں کی جاتی ۔
ان سوالات کے جوابات مرحمت فرمانے کے بعد چونکہ اس ملک میں انتشار اور افتراق کا اندیشہ تھا اور جدت پسند لوگوں کی طرف سے کچھ ایسی ہوائیں چل رہی تھیں کہ رمضان و عید وغیرہ میں سعودی کی اتباع کرنا چاہیے، جب کہ یہاں کی تینوں جمعیتیں (کیپ ٹاؤن، نٹال، اور ترانزوال) برابر خدمت میں مصروف تھیں، اور رؤیت ہلال کا متفقہ فیصلہ صادر کر رہی تھیں، لہذا اس خلجان اور انتشار کے دفعیہ کے لیے حضرت مفتی صاحب مد ظلہ نے فقہاء کے اقوال و عبارات کا جامع اور مستحکم ایک مقالہ تحریر فرمایا جس کو سپرد قرطاس کیا جاتا ہے ۔