خیراتی ادارے اور انجمن کے اموال پر وجوبِ زکوٰۃ کا حکم:

بصورتِ مسئولہ انجمن اور خیراتی اداروں کی رقوم چندہ دہندگان کی ملک سے نکل چکی ہیں اور انجمن وغیرہ خیراتی ادارے شخصی قانون ہے لیکن اس کا کوئی معین شخص مالک نہیں ہے، اسی وجہ سے انجمن کے اراکین میں سے کسی کے انتقال کے بعد اس رقم کا حصہ میت کے ورثاء کو واپس نہیں کیا جاتا یعنی ترکہ نہیں بنتا بنا بریں اس قسم کی رقوم پر زکوٰۃ واجب اور لازم نہیں ہو گی ۔
ملاحظہ ہو بدائع الصنائع میں مرقوم ہے:

وأما الشرائط التي ترجع إلى المال فمنها الملك فلا تجب الزكاة في سوائم الوقف والخيل المسبلة لعدم الملك وهذا لأن في الزكاة تمليكاً والتمليك في غير الملك لا يتصور. (بدائع الصنائع: ۲/۹، سعيد). (وكذا في الدر المختار: ۲/۲۷۷، سعيد).
وقال في المبسوط: قال الشيخ الإمام الأجل

الزكاة لا تجب إلا باعتبار الملك والمالك ولهذا لا تجب في سوائم الوقف ولا في سوائم المكاتب. (المبسوط للإمام السرخسي: ۳/۹٤، ط: بيروت).
وفي الموسوعة الفقهية الكويتية: الشرط الأول: كون المال مملوكاً لمعين: فلا زكاة فيما ليس له مالك معين، ومن هنا ذهب الحنفية إلى أن الزكاة لا تجب في سوائم الوقف، والخيل المسبلة، لأنها غير مملوكة. قالوا: لأن في الزكاة تمليكاً، والتمليك في غير الملك لا يتصور. (الموسوعة: ۲۳/۲۳٦، ط: الكويت).

کفایت المفتی میں ہے:
محلہ کا وہ پیسہ جو جماعت کا مشترک روپیہ ہو اور لوگوں کے کام آنے کے لیے جمع ہو یا مسجد کا روپیہ ہو اس میں زکوٰۃ واجب نہیں ہے ۔ (کفایت المفتی: ٤/۲٦۵، دار الاشاعت) ۔
جدید فقہی مسائل میں ہے:
جس مال کا کوئی متعین مالک نہ ہو بلکہ مسجد یا مدرسہ یا اور کوئی ادارے اس کے مالک ہوں ان میں زکوٰۃ واجب نہ ہو گی ۔ (جدید فقہی مسائل: ۲/۵۰) ۔
مزید ملاحظہ ہو: (جدید فقہی مباحث: ٦/۲۰، ۲۱) ۔
احناف کے یہاں شخص قانونی پر زکوٰۃ واجب نہیں ہے ۔ ملاحظہ ہو درسِ ترمذی میں ہے:
مشترک مال پر شخص قانونی کی حیثیت سے زکوٰۃ نہیں ہو گی ۔ (درسِ ترمذی: ۲/٤۲۵) ۔
مزید ملاحظہ ہو: (احسن الفتاوی: ۱/٤۳۲) ۔
قانونِ شخصی کی تفصیل کے لیے ملاحظہ ہو: (فتاوی دار العلوم زکریا، جلدِ چہارم، ص ٦٦۰ ۔ ٦٦٦) ۔
واللہ سبحانہ و تعالی اعلم