قرآنِ کریم کی قسم کھانے کا حکم:

کتبِ احادیث کی ورق گردانی سے معلوم ہوتا ہے کہ غیر اللہ کی قسم کھانا ممنوع ہے ۔ لیکن متأخرین فقہاء نے عرف کی وجہ سے قرآنِ کریم کی قسم کھانے کو صحیح قرار دیا ہے، لہذا صورتِ مسئولہ میں قسم منعقد ہو گئی اور قسم توڑنے کی وجہ سے قسم کا کفارہ لازم ہو گیا ۔ نیز قرآن کریم اللہ تعالیٰ کا کلام اور صفت ہے ۔
ملاحظہ فرمائیں در مختار میں ہے:

لا يقسم بغير الله كالنبي والقرآن والكعبة قال الكمال: ولا يخفي أن الحلف بالقرآن الآن متعارف فيكون يميناً وأما الحلف بكلام الله فيدور مع العرف وقال العيني رحمه الله: وعندي أن المصحف يمين لا سيما في زماننا، وعند الثلاثة: المصحف، والقرآن، وكلام الله يمين. وفي الشامي: قوله وقال العيني: عبارته: وعندي لو حلف بالمصحف أو وضع يده عليه وقال: وحق هذا فهو يمين، ولا سيما في هذا الزمان الذي كثرت فيه الأيمان الفاجرة ورغبة العوام في الحلف بالمصحف. (الدر المختار مع فتاوى الشامي: ۳/۷۱۲، ۷۱۳ مطلب في القرآن، سعيد. وكذا في فتح القدير: ٤/۳۵٦، دار الفكر).

عالمگیری میں ہے:

قال محمد رحمه الله في الأصل: لو قال والقرآن لا يكون يميناً ذكره مطلقاً

وقد قيل هذا في زمانهم أما في زماننا فيكون يميناً وبه نأخذ ونأمر. (الفتاوى الهندية: ۲/۵۳. وكذا في البحر الرائق: ٤/۲۸٦، كوئته).

حضرت مولانا ظفر احمد تھانوی رحمه الله امداد الاحکام میں تحریر فرماتے ہیں:
قرآن شریف کی قسم کھا کر اگر خلاف کرے تو کفارہ لازم ہے ۔ (امداد الاحکام: ۲/۳۳) ۔
مولانا خالد سیف اللہ رحمانی قاموس الفقہ میں تحریر فرماتے ہیں:
جہاں تک قرآن مجید کی قسم کھانے کی بات ہے، تو فقہائے حنفیہ کی اصل رائے تو یہی ہے کہ اس سے قسم منعقد نہیں ہو گی، لیکن ائمہ ثلاثہ کے نزدیک اس سے قسم منعقد ہو جاتی ہے، ابن ہمام رحمه الله نے لکھا ہے کہ صاحبِ ہدایہ وغیرہ نے قرآن کی قسم غیر درست ہونے پر اس بات سے استدلال کیا ہے کہ اس طرح قسم کھانا متعارف نہیں، لیکن ہمارے زمانے میں قرآن مجید سے قسم کھانا مروج و معروف ہے، اس لیے قرآن کی قسم منعقد ہوگی ۔ (قاموس الفقہ: ۵/۳۵٦) ۔
مزید ملاحظہ ہو: (فتاوی محمودیہ: ۱٤/۳۸ ۔ و فتاوی دار العلوم دیوبند: ۸/۳۸) ۔
واللہ سبحانہ و تعالی اعلم