حق تصنیف پر معاوضہ لینے کا حکم:

حق تصنیف پر معاوضہ لینا جائز ہے ۔ سوال میں ذکر کردہ صورتوں میں سے پہلی صورت کا حکم یہ ہے کہ اس کے جواز میں کوئی کلام نہیں ہے، اس کا حکم وہی ہے جو امامت اور درس و تدریس کے معاوضہ کا ہے، نیز وہ تصنیف ناشر یا مطبع کی ملکیت ہو گی کیوں کہ اس نے اس عمل کی اجرت ادا کی ہے ۔
(۲) اور (۳) کے بارے میں پہلے اہل علم کا اختلاف رہا ہے ابتداءً اکثر علماء اسے ناجائز کہتے تھے، مگر فی زماننا زیادہ تر علماء کا رجحان جواز کی طرف ہے اور عام طور پر حق تصنیف و تالیف کو درج ذیل وجوہات کی بنا پر مصنف کا حق تسلیم کیا جاتا ہے ۔
(۱) موجود ہ عرف میں "حق تالیف" وغیرہ کے ساتھ مال جیسا معاملہ کیا جاتا ہے، بازار میں اس کی خرید و فروخت اعلی پیمانے پر رائج ہے ۔ اور کسی شے کو مال شمار کرنے کے لیے لوگوں کے تعامل کا بڑا دخل ہے، جس کی تفصیلات گزر چکی ۔
(۲) فقہاء نے قرآن و حدیث اور فقہ وغیرہ کی تعلیم پر اجرت لینے کی اجازت دی ہے، اور اس کی جو علت بیان کی ہے وہ یہاں بھی پائی جاتی ہے، مثلاً مصلحت کی بنیاد پر کہ اگر ایسا نہ کیا جائے تو تعلیم و تعلم کا یہ سلسلہ متاثر ہو جائے گا، اسی طرح اگر بیش بہا محنت و مشقت کے باوجود یہ حق مصنف کونہ دیا جائے، تو اس کی حوصلہ شکنی ہو گی، کیوں کہ مصنف اس کام میں اپنا اچھا خاصا وقت اور دماغی و فکری طاقت صرف کرتا ہے، نیز دین کی حفاظت و اشاعت اور تحقیق کا کام بھی متاثر ہو سکتا ہے، پس یہ ایسی مصلحت ہے جسے نظر انداز نہیں کیا جا سکتا ۔
(۳) یہ حق اسبقیت ہے جو کہ شریعت کی نگاہ میں معتبر ہے ۔ ابو داود شریف کی روایت میں ہے: "
من سبق إلى ما لم يسبقه إليه مسلم فهوله". (رواه البيهقي في سننه الكبرى: ٦/۱٤۲، كتاب إحياء الموات. وأبو داود: ۲/٤۳۷، باب في اقطاع الأرضين).

(٤) کسی شے کو مال قرار دینے کے لیے اس کا قابل احراز یعنی حفاظت کیے جانے کے لائق ہونا ضروری ہے، اور مذکورہ حقوق کا احراز قانونی طور پر رجسٹری کے ذریعہ ہو جاتا ہے ۔
(۵) مال کے لیے ایک شرط یہ بھی ہے کہ قابل انتفاع ہو، اور اس حق سے وافر مقدار میں فائدہ اٹھایا جاتا ہے ۔
(٦) ان حقوق کو قانونی حیثیت دینے کے لیے محنت و مشقت کے ساتھ ساتھ سرمایہ بھی خرچ کرنا پڑتا ہے لہذا ان کو کسب کا ذریعہ بنایا جا سکتا ہے ۔
مزید ملاحظہ ہو: (حقوق اور ان کی خرید و فروخت، ص
۲۰۸
۔
۲۱۵
۔ و جدید فقہی مسائل:
٤
/
۱۷۸
۔
۱۸٤
۔ فقہی مقالات:
۱
/
۲۲۳
۔
۲۲۷
۔ و عطر ہدایہ، ص
۳٤۳
۔
۳٤٤
۔ و جدید فقہی مباحث، جلدِ سوم) ۔
واللہ سبحانہ و تعالی اعلم