ذبح اختیاری کی جگہ اضطراری استعمال کرنے کا حکم:

شریعتِ مطہرہ کے قانون کے مطابق انسان جب تک ذبح اختیاری پر قادر ہو اس وقت تک ذبح اضطراری کی طرف نہیں جا سکتا ۔ اور اختیاری صورت سے مراد ان جانوروں کا ذبیحہ ہے جو گھروں میں پالے جاتے ہیں، جیسے بکری، گائے، بیل، بھینس وغیرہ اور کسی جنگلی جانور جیسے ہرن وغیرہ کو گھر میں پال کر مانوس بنا لیا جائے تو وہ بھی اسی حکم میں داخل ہو جاتا ہے ۔ قرآن و سنت کی روشنی میں اس اختیاری اسلامی ذبیحہ کے لیے درج ذیل تین شرائط کا لحاظ رکھنا لازم اور ضروری ہے: ۔
(۱) ذابح کا مسلمان یا کتابی ہونا ۔
(۲) بوقتِ ذبح اللہ کا نام لینا ۔
(۳) شرعی طریقہ پر حلقوم اور مرئی اور خون کی رگیں کاٹ دینا ۔ ان میں سے کوئی ایک بھی رہ جائے گی تو وہ اسلامی ذبیحہ نہیں ہوگا ۔
بصورت مسئولہ مذبح ریمبوچکن میں مرغیاں چونکہ انسانوں کے قابو میں ہیں لہذا، ذبح اختیاری ہی متعین ہے، اس کو ذبح غیر اختیاری (اضطراری) میں شامل کرنا درست نہیں ہے ۔
تفصیلی دلائل کے لیے درج ذیل کتب ملاحظہ فرما لیں:

(الاختيار لتعليل المختار: ۵/ ۱۰، الدر المختار مع رد المحتار: ٦/ ۳۰۳، سعيد، والجوهرة النيرة: ۲/ ۲۷۷، وتكملة البحر الرائق: ۸/ ۱٦۷، وجواهر الفقه: ۲/ ۳۸۱، اسلامي ذبيحه).

تنبیہ: ریمبوچکن کے بارے میں ہمارے ہاں سے تفصیلی فتوی شائع ہو چکا ہے اس کو ملاحظہ کیا جا سکتا ہے ۔
واللہ سبحانہ و تعالی اعلم