تفریحی کھیل کا حکم:

مقامی علمائے کرام اور دیندار حضرات اگر اس میں کوئی خرابی نہیں دیکھتے اور اس میں مصلحت سمجھتے ہیں کہ عوام کا مسجد سے تعلق بڑھے گا، اور فائدہ ہو گا، اور شریعت کی حدود کی پابندی ہو تو شرعاً ایسا کھیل اور پروگرام جائز اور درست ہو گا ۔
رہی یہ بات کہ آنے والوں کے لیے ٹکٹ خریدنا ہے تو اس کا حکم یہ ہے کہ دعوتِ طعام ایک تبرع ہے اور اس کے لیے ٹکٹ کی شرط لگائی، اور اس ٹکٹ کے لینے میں ہر آدمی خود مختار ہے لہذا یہ معاملہ تبرع مشروط کے حکم میں داخل ہو کر جائز اور درست ہو گا ۔
فتاوی محمودیہ میں ہے:
کرکٹ، ہاکی، وغیرہ میں ایک غرضِ صحیح کے پیش نظر اجازت ہے یہ سب ممنوع محض نہیں (فتاوی محمودیہ: ۱۹/۵۳٤، جامعہ فاروقیہ) ۔
حضرت مفتی محمد شفیع صاحب رحمه الله فرماتے ہیں:
جن کھیلوں سے کچھ دینی یا دنیوی فوائد حاصل ہو سکتے ہیں وہ جائز ہیں بشرطیکہ انھیں فوائد کی نیت سے ان کو کھیلا جائے، محض لہو لعب کی نیت نہ ہو، لیکن اس کی بازی پر کوئی معاوضہ یا انعام مشروط مقرر کرنا جائز نہیں ۔
مثلاً: گیند کا کھیل کہ اس سے جسمانی ورزش ہوتی ہے یا لاٹھی وغیرہ کے کھیل یا پہلوانوں کی کشتی وغیرہ جو قوتِ جہاد میں معین ہو سکتے ہیں ۔ اسی طرح معمہ بازی، شعر بازی، تعلیمی تاش وغیرہ ہار جیت کی بازی لگانا جائز ہے مگر اس پر کوئی رقم معاوضہ کی مقرر کرنا جائز نہیں، بلکہ حرام ہے ۔ (جواہر الفقہ: ۲/۳۵۷، مفید کھیل) ۔
فتاوی محمودیہ میں ہے:
اگر ورزش اور مشق جہاد اور تندرستی باقی رکھنے کے لیے کھیلے تو درست ہے، مگر ستر پوشی اور دیگر حدودِ شریعت کی رعایت لازم ہے، انہماک کی وجہ سے احکامِ شرعیہ: نماز و جماعت وغیرہ میں خلل نہ آئے ۔ (فتاوی محمودیہ: ۱۹/۵۳۳، جامعہ فاروقیہ) ۔
واللہ سبحانہ و تعالی اعلم