صبح سویرے تحفیظ قرآنِ کریم کے حلقے لگانے کا حکم:

ہمارے مشاہدے اور تجربے کے مطابق قرآنِ کریم حفظ کرنے کے لیے صبح کا وقت زیادہ مناسب اور موزون ہے اور طلبہ کے لیے یاد کرنے میں معاون ہے، کیوں کہ بوقتِ صبح طبیعت میں نشاط و تازگی ہوتی ہے اسی وجہ سے بہت سارے علمائے کرام نے حفظ کے لیے صبح کے وقت کو پسند کیا ہے، عرب و عجم میں اسی پر عمل در آمد ہے۔ قرآن و سنت سے اس کے شواہد ملاحظہ کیجیے:
(۱) اللہ تعالی فرماتے ہیں:
﴿وقرآن الفجر، إن قرآن الفجر كان مشهوداً﴾ [الاسراء: ۷۸]،

(۲) حدیث شریف میں ہے:
عن على رضي الله عنه قال: قال رسول الله ﷺ: "اللهم بارك لا متى في بكورها". (رواه الترمذي، رقم الحديث: ۱۲۱۲، وأحمد: ۱۳۲).

شیخ عبد الرؤوف المناوی اس حدیث کے تحت فرماتے ہیں:
أخذ منه أنه يندب لمن له وظيفة من نحو قراءة أو ورد أو علم شرعي أو حرفة فعله أول النهار. (التيسير بشرح الجامع الصغير: ۱/٤۱٤).

یعنی جس کے کوئی معمولات وغیرہ ہوں، مثلاً: تلاوتِ قرآن، ذکر و اذکار وغیرہ تو مستحب یہ ہے کہ صبح سویرے ان کو پورا کر لیا جائے، کیوں کہ اس وقت میں من جانب اللہ خیر و برکت ہوتی ہے۔

(
۳
) عن أبي ذر رضي الله عنه قال: قال لي رسول الله ﷺ: يا أباذر لأن تغدو فتعلم آية من كتاب الله خير لك من أن تصلي مائة ركعة ولأن تغدو فتعلم باباً من العلم عمل به أو لم يعمل خير من أن تصلي ألف ركعة. (رواه ابن ماجه، رقم: ۲۱۹).

حضرت ابو ذر رضی اللہ تعالی عنہ فرماتے ہیں: نبی کریم ﷺ نے مجھے ارشاد فرمایا: اے ابو ذر! اگر تم صبح جا کر ایک آیتِ کریمہ سیکھ لو تو سو رکعات نوافل سے بہتر ہے اور اگر علمِ دین کا ایک باب سیکھ لو خواہ وہ اس وقت کا عمل ہو یا نہ ہو تو ہزار رکعات نوافل سے افضل ہے۔
واللہ سبحانہ و تعالی اعلم