مسجدِ حرام میں عورت کو حیض شروع ہو جائے تو باہر نکلنے کا حکم:

عورت کو حیض آتے ہی مسجد سے باہر نکل جانا چاہیے لیکن ہجوم کی وجہ سے نکلنا دشوار ہو تو بدرجہ مجبوری تیمم کر کے وہی بیٹھی رہے اور حتی الامکان باہر نکلنے کی کوشش کرتی رہے ۔ جیسے جنبی کے بارے میں فقہاء نے لکھا ہے کہ مسجد میں احتلام ہو جائے تو فی الفور مسجد سے نکل جائے لیکن اگر باہر جانے میں خوف ہو تو تیمم کر کے مسجد میں رہ سکتا ہے ۔ ملاحظہ ہو فتاوی الشامی میں مذکور ہیں:

ولو كان نائماً فيه فاحتلم والماء خارجه وخشي من الخروج يتيمم وينام فيه إلى أن يمكنه الخروج، قال في المنية وإن احتلم في المسجد تيمم للخروج إذا لم يخف وإن خاف يجلس مع التيمم ولا يصلي ولا يقرأ. (فتاوى الشامي: ۱/۲٤۳، سعيد).
(وكذا في حاشية الطحطاوي على مراقي الفلاح، ص ۱٤٤، والبحر الرائق: ۱/۲۰٦، دار المعرفة).

عمدۃ الفقہ میں مولانا سید زوار حسین صاحب فرماتے ہیں: اگر کسی کو مسجد میں احتلام ہو جائے تو وہ تیمم کر کے جلد باہر نکلے یہ تیمم جائز ہے واجب نہیں اور اگر دشمن یا جانور کے خوف کی وجہ سے جلد نہ نکلے اور وہیں ٹھہرا رہے تو تیمم کر کے ٹھہرے یہ تیمم واجب ہے ۔ (عمدۃ الفقہ: ۱/۲۵۹، ط: زوار اکیڈمی) ۔
مزید ملاحظہ ہو : (کتاب الفتاوی: ٤/۲٦۰) ۔
واللہ سبحانہ و تعالی اعلم