بینک کا وکالت پر اجرت لینے کا حکم:

وکیل کا اجرت کے ساتھ کام کرنا جائز اور درست ہے جب کہ وہ وکیل اجرت لینے میں معروف و مشہور ہو یا پہلے سے بتلا دیا جائے اور اجرت بھی متعین کر دی جائے، تاکہ بعد میں نزاع واقع نہ ہو، چنانچہ بینک کا دس ہزار لے کر اپنے موکل کے لیے گاڑی خریدنا جائز اور درست ہے۔ ملاحظہ ہو فتح القدیر میں مرقوم ہے:

والصواب أن مراد صاحب العناية هو أنه قد يكون في نفس الوكالة التعاوض كما إذا أخذ الوكيل الأجرة لا قامة الوكالة فإنه غير ممنوع شرعاً، إذ الوكالة عقد جائز لا يجب علي الوكيل إقامتها فيجوز أخذ الأجرة فيها. (فتح القدير: ۸/۳، دار الفكر، وفتاوى الشامي: ۷/۲٦۹).

اسلامی فقہ میں ہے: با اجرت وکیل میں وہ تمام لوگ شامل ہیں جو اجرت لے کر یا کمیشن پر کوئی کام کرتے ہیں، کسی حکومت کے تمام ملازمین اس کے وکیل ہوتے ہیں، اس لیے ان کو اپنی حکومت کی مرضی کے مطابق کام کرنا چاہیے، آپ اپنے ذاتی ملازم سے کوئی کام کرائیں تو یہ آپ کا وکیل سمجھا جائے گا، اسی طرح اگر آپ کمیشن ایجنٹ مقرر کریں تو یہ آپ کا وکیل سمجھا جائے گا، یعنی اس کو آپ کی ہدایت کے مطابق کام کرنا چاہیے۔ (اسلامی فقہ: ۲/ ٦٤۷) ۔
مزید ملاحظہ ہو: (فتاوی دار العلوم زکریا: ۵/۷۲۰ و ۷۱۷ ط: زمزم، و جدید معاملات کے شرعی احکام: ۱/۲۲۸) ۔
واللہ سبحانہ و تعالی اعلم