طبیب کی غلطی پر تاوان کا حکم:

جس ڈاکٹر کو قانوناً علاج و معالجہ کی اجازت ہے اس نے اگر کسی مریض کا علاج کیا لیکن اس نے طبی احتیاط ملحوظ نہیں رکھی تو ڈاکٹر مریض کو پہنچنے والے نقصان کا یا اس کی جان کے تاوان کا ضامن ہوگا ۔ اس لئے کہ اس نے شرط کی تکمیل نہیں کی، اس کی ذمہ داری تھی کہ مریض کے علاج میں طبی تمام رعایتیں ملحوظ رکھتا، اور اس کے ضروری تقاضوں کو پورا کرتا، لیکن اس نے ایسا نہ کر کے غلطی کی، اس لئے وہ ضمان ہوگا ۔ (طبی اخلاقیات، ص ۱۲۸، مرتبہ قاضی مجاہد) ۔
ہدایہ میں ہے:

وإذا فصد الفصاد أو بزغ البزاغ ولم يتجاوز الموضع المعتاد فلا ضمان عليه، وعلى هامشه ولو تجاوز الموضع المعتاد ضمن. (الهداية مع الحاشية ۳/ ۳۱۰).

مجمع الضمانات میں ہے:

الفصاد والبزاغ والحجام والختان لا يضمنون بسراية فعلهم إلى الهلاك إذا لم يجاوز الموضع المعتاد المعهود المأذون فيه وهي معروفة

قال في الفصولين هذا إذا فعلوا فعلا معتادا ولم يقصروا في ذلك العمل

أما لو فعلوا بخلاف ذلك ضمنوا

استأجر حجاما ليقلع له سنا فقلع فقال صاحب السن: ما أمرت بقلع هذا، كان القول قوله، ويضمن القالع إرش السن. (مجمع الضمانات: ۱/۱٤۵، ۱٤٦، الفرع العاشر، دار السلام).

اہم فقہی فیصلہ میں مذکور ہے:
اگر کسی مستند معالج نے علاج میں کوئی کوتاہی کی اور اس کی وجہ سے مریض کو ضرر پہنچ گیا تو معالج ضامن ہوگا ۔ (اہم فقہی فیصلے از قاضی مجاہد الاسلام، ص ۸٤) ۔
خلاصہ یہ ہے کہ طبیب کی غلطی کی وجہ سے ۱۰ ہزار رینڈ لینا مریض کے لئے جائز اور درست ہے ۔
واللہ سبحانہ و تعالی اعلم