ایک مدرسہ کا چندہ دوسرے مدرسہ میں خرچ کرنے کا حکم:

اگر چندہ کرنے والے نے چندہ کرتے وقت صراحۃً یہ بتلا دیا کہ فلاں مدرسہ کے لیے چندہ کرتا ہوں تو پھر جب تک اس مدرسہ کو چندہ کی ضرورت ہے یا قریبی زمانہ میں ضرورت ہو گی اس وقت تک دوسرے مدرسہ میں دینا صحیح نہیں ہے ۔ ہاں اگر اس مدرسہ کونہ فی الحال رقم کی ضرورت ہے اور نہ آئندہ قریبی زمانہ میں ضرورت ہو گی اور دوسرا مدرسہ سخت حاجت مند ہے تو بایں صورت بعض فقہاء نے دوسرے مدرسہ میں صرف کرنے کی اجازت دی ہے ۔ البتہ احوط طریقہ یہ ہے کہ معطی کے ساتھ رابطہ ہو سکتا ہے تو اس سے اجازت حاصل کر لے پھر دوسرے مدرسہ میں خرچ کرے ۔
فتاوی محمودیہ میں ہے:
جس جگہ خرچ کرنے کے لیے وہ روپیہ دیا ہے اسی جگہ خرچ کرنا لازم ہے اگر دوسری جگہ خرچ کر دیا تو ضمان لازم ہوگا اس لیے کہ متولی امین اور وکیل ہے معطی کی تصریح کے خلاف خرچ کرنے کا اس کو حق نہیں ۔ (فتاوی محمودیہ: ۱۵/٤۷٤، فاروقیہ) ۔
نیز مرقوم ہے چندہ دینے والوں کو اگر یہ منظور ہے اور اس پر کوئی اعتراض نہیں تو ایسا کرنا شرعاً درست ہے ۔ (فتاوی محمودیہ: ۱۵/٤۷٤، فاروقیہ) ۔
فتاوی دار العلوم دیوبند میں ہے:
جن لوگوں نے اپنی جائداد یا روپیہ نقد مسجد کو دیا ہے اگر وقف کے وقت انہوں نے یہ شرط لگائی تھی کہ جو روپیہ مسجد کے خرچ سے زائد ہو وہ کسی اسلامی مدرسہ میں یا اور کسی مصرفِ خیر میں صرف کیا جائے تب تو یہ زائد روپیہ مدرسہ پر صرف ہو سکتا ہے خواہ اس وقت وقف کرنے والے اس پر آمادہ بھی نہ ہوں یا اگر وقف کرنے والوں نے بوقتِ وقف یہ شرط کر لی ہو کہ ہمیں اس جائداد اور روپیہ میں مصرف بدل نے کا اختیار حاصل رہے گا تب بھی واقفین اپنے اختیار سے دوسری جگہ خواہ مدرسہ میں یا کسی اور جگہ صرف کر سکتے ہیں، اور اگر بوقت وقف ان دونوں شرطوں میں سے کوئی شرط نہیں کی گئی تو پھر مسجد کا فاضل روپیہ کسی مدرسہ پر خرچ کرنا کسی طرح جائز نہیں ۔ البتہ کوئی دوسری مسجد اگر محتاج چندہ ہو اس میں بوجہ شدتِ ضرورت جواز کا فتویٰ علی رأی المتأخرین دیا جا سکتا ہے وہ اس وقت کہ جس مسجد کا روپیہ ہے اس کونہ اس وقت حاجت ہو اور نہ آئیدہ ایسی حاجت بنظر ظاہر مظنون ہو اور روپیہ جو فاضل جمع ہیں اس کے ضائع ہو جانے کا خطرہ ہو ۔ (امداد المفتین:
۲
/
۷٦۸
، دار الاشاعت) ۔
واللہ سبحانہ و تعالی اعلم