میڈیا کی ایڈوٹائزنگ کرنے کا حکم:

بصورتِ مسئولہ کمپنی کی مصنوعات کی تشہیر اور اس کے اشتہارات جو شریعت کے دائرہ میں رہ کر ہوں جائز ہیں یعنی اشتہارات میں جاندار کی تصویر یا موسیقی یا لہو و لعب وغیرہ شامل نہ ہو تو ایسی ایجنسی کی اجازت ہے اور اس کی آمدنی بھی حلال ہے ۔ ملاحظہ ہو فتاوی شامی میں منقول ہے:

قال في البزازية: إجارة السمسار والمنادي والحمامي والصكاك وما لا يقدر فيه الوقت ولا العمل تجوز لما كان للناس به حاجة ويطيب الأجر المأخوذ لو قدر أجر المثل. (فتاوى الشامي: ٦/٤۷، سعيد).
وفيه أيضاً: تتمة: قال في التاتارخانية: وفي الدلال والسمسار يجب أجر المثل وما تواضعوا عليه إن في كل عشرة دنانير كذا فذاك حرام عليهم، وفي الحاوي: سئل محمد بن مسلمة عن أجرة السمسار فقال: أرجوا أنه لا بأس به وإن كان في الأصل فاسداً لكثرة التعامل وكثير من هذا غير جائز فجوزوه لحاجة الناس إليه كدخول الحمام. (فتاوى الشامي: ٦/٦۳، سعيد).

قاموس الفقہ میں مرقوم ہے:
آج کل مختلف تجارتوں میں کمیشن کا طریقہ مروج ہو گیا ہے، یعنی کمپنی اپنا مال فروخت کرنے والوں کو بجائے تنخواہ متعین کرنے کے فیصد متعین کر دیتی ہے، مثلاً: جتنی فروخت ہو گی اس کا دس فیصد اسے بہ طورِ اجرت دیا جائے گا بہت سے دینی اور عصری اداروں میں جو لوگوں کے تعاون پر چلا کرتے ہیں، اب یہ طریقہ مروج ہوتا جا رہا ہے کہ اُنھیں متعینہ تنخواہ دینے کے بجائے کچھ فیصد اجرت دے دی جائے، اس میں مدرسہ والے اپنے لیے یہ عافیت سمجھتے ہیں کہ اگر تنخواہ مقرر کی جائے تو ایسا ہو سکتا ہے کہ وہ محنت میں کمی کرے احناف میں مشائخ بلخ نے عرف کی رعایت کرتے ہوے اس کی اجازت دی ہے ۔ (قاموس الفقہ: ۱/٤۹۹) ۔
دوسری جگہ مذکور ہے: جس طرح خود کسی ناجائز اور خلاف شرع کام کرنا درست نہیں اسی طرح ایسے کاموں میں ملازمت اور تعاون بھی درست نہیں اس لیے بینک، انشورنس، شراب خانوں، قحبہ خانوں کی ایسی ملازمت جائز نہیں ہو گی جس میں آدمی سود، قمار، شراب یا قحبہ کے کاروبار کا ذریعہ بنے، اس کی طرف لوگوں کو دعوت دے، سود کے حساب و کتاب لکھے، ہاں چپراسی وغیرہ کی ملازمت کی جا سکتی ہے، کیوں کہ اس کا براہِ راست اس کاروبار سے کوئی تعلق نہیں ۔ (قاموس الفقہ: ۱/۵۰۰) ۔
اسلامی فقہ میں ہے:
جن چیزوں سے کسی جرم یا گناہ کی ترغیب ہوتی ہو ان کا بیچنا اور خریدنا سب حرام ہے، مثلاً کسی سامان سے یا سامان پر بنی ہوئی تصویر سے یا اشتہار سے، زنا کی، سود لینے کی، شراب پینے کی، چوری یا ڈاکے یا کسی اور جرم کی ترغیب ہوتی ہو، ان کی خرید و فروخت اور اشاعت دونوں حرام ہے، سینما کا موجودہ کاروبار، غیر تمدنی، فلم سازی، عریاں تصویریں، فحش گانے اور فحش ناولیں یہ سب حرام ہیں ۔ (اسلامی فقہ: ۲/۳۸۰) ۔
واللہ سبحانہ و تعالی اعلم